Albana Dhimitri Nov 3, 2008:

Përshëndetje! 1) Papërsëritshmëri. Po, kjo do të ishte fjala, që në mungesë të mjedisit gjuhësor rrethues, do të ishte më pranë kuptimit të uniqueness. Por, në rastin tonë mendoj se nuk bëhet fjalë për papërsëritshmërinë (nuk ekziston një tjetër i njëjtë) por, për vërtetësinë (cilësinë e të qenët i vërteti) në dallim nga rremësia (të qenët një tjetër/i rremë/ jo i vërteti/fals.

2) Kontrolloj është një fjalë e huazuar (ashtu si edhe verifikim).Pra, zëvendësimi i një fjale të huazuar me një tjetër po të huazuar nuk më duket se shërben nga ana e pastërtisë së gjuhës.

3) Unë do të përdorja fjalën shqip vërtetim: sipas Fjalorit të Gjuhës së Sotme Shqipe (1980), vërtetoj - tregoj se një dokument është i saktë dhe ka vlerë të plotë (ky përshkrim nga specialistë të gjuhës besoj se na jep të drejtën të flasim për vërtetim e vërtetësi të dokumentit, apo jo?).

4) Pra, unë do ta përktheja shprehjen në fjalë, vërtetimi i vërtetësisë por, kjo hasje e së njëjtës rrënjë në dy fjalë të njëpasnjëshme bie ndesh me parimin e parapëlqimit të larmisë së gjuhës në tekst (pa dobësuar anën kuptimore). Ndaj zgjodha një fjalë të huazuar (por, të shumëpërdorur në shqip dhe të përfshirë në Fjalorin e Gjuhës Së Sotme Shqipe fq. 2134).

5) Kuptimi që jepet në këtë fjalor:
Verifikim - prova e kontrolli që bëhet për të vërtetuar saktësinë e diçkaje.
Verifikoj - provoj vërtetësinë a saktësinë e diçkaje duke e kontrolluar,duke e parë a duke e studiuar edhe një herë a duke e ballafaquar me një tjetër.
Përkthime të mbara!

Gentiana Kasemi Nov 2, 2008:

"Unique" = "I papërsëritshëm" "Uniquennes" = "Papërsëritshmëri".
Pajtohem me ndryshimin që sjell Fabiana mes "uniqueness" dhe "authenticity". Do të shtoja që unë konceptin "uniqueness" e kam hasur nëpër kontrata: i referohet një marrëveshjeje, njëra nga klauzolat e së cilës është që dokumenti i marrëveshjes është i vetëm e i papërsëritshëm, "unik" pra që nuk ekziston një dokument tjetër i ngjashëm, një marrëveshje e një pale me dikë tjetër për të njëjtin objekt marrëveshjeje. Koncepti i autenticitetit mendoj se lidhet me vërtetimin e një kopjeje a përkthimi si i njëjtë me origjinalin (e kam hasur përherë në këtë kuptim në fushën ligjore).
Nëse do të flitej për guxim, unë do të guxoja të përdorja "kontrolli i papërsëritshmërisë" më tepër sesa të përdorja fjalë të huazuara që janë po aq të gjata e të stërholluara.
Ndërsa fjalë si "vërtetim" "verifikim" i largohen (dhe i shtojnë nuanca të tjera) kuptimit të shprehjes origjinale; "verifikim" është fjalë e huazuar plotësisht e shmangshme dhe e zëvendësueshme në shqip (unë e shmang sa herë që mundem).
Nëse do të duhej të përdorej medoemos një fjalë e huaj, "unikalitet" shpreh saktë konceptin në fjalë, megjithëse mua nuk më tingëllon bukur.
Shëndet të gjithëve.

Fabiana Papastefani-Pezzoni Nov 2, 2008:

Uniqueness dhe Authentic Përshëndetje të gjithëve. Nëse kjo është në lëmin ligjor, ka një dallim në këtë mes. Ka një lloj verifikimi (dhe këtu jam dakord me Albanën që "verifikim" do të ishte përshtatja për "controll" në këtë rast) që lidhet me faktin që duhet provuar që ekziston vetëm një kopje autentike e X dokumenti. Pra kalohet pakëz kufiri i vërtetësisë dhe duhet provuar që ky dokument i vërtetë gjendet në një kopje të vetme<br>
Për sa i përket fjalës unikalitet, të mos harrojmë që kjo fjalë hynë në gamën e fjalëve të cilat tashmë kanë hyrë në shqip dhe nuk kemi si ta mohojmë që kjo fjalë është përdorur dhe ende përdoret. Në gjuhën letrare dhe artistike mund të zëvendësohet me "veçanti" kurse në gjuhën e saktë teknike dhe ligjore më mirë le t'i përmbahemi kontekstit, që vetëm Sherefedini e di dhe e vendos.